മൈക്രോ ബ്ലോഗിംഗ് രംഗത്തെ അതികായരായ ട്വിറ്ററിന് കനത്ത വെല്ലുവിളി സൃഷ്ടിച്ച് പുതിയ സോഷ്യൽ മീഡിയ ആപ്പ് അവതരിപ്പിച്ചിരിക്കുകയാണ് മെറ്റയുടെ ഉടമസ്ഥതയിലുള്ള ഇൻസ്റ്റഗ്രാം. ത്രഡ്സ് എന്ന ടെക്‌സ്‌റ്റ് അധിഷ്‌ഠിത സംഭാഷണ ആപ്പ് തത്സമയം സന്ദേശങ്ങൾ രചിക്കാനും പങ്കിടാനും ആളുകളെ അനുവദിക്കുന്നു. ത്രെഡ്സും ട്വിറ്ററും തമ്മിലുള്ള വ്യത്യാസങ്ങൾ എന്തൊക്കെയെന്ന് നോക്കാം.
- ത്രെഡ്സിൽ ഉപയോക്താക്കൾക്ക് 500 അക്ഷരങ്ങൾ അടങ്ങിയ പോസ്റ്റുകൾ നൽകാനാകും. എന്നാൽ വെരിഫൈ ചെയ്യാത്ത ട്വിറ്റർ ഉപയോക്താക്കൾക്ക് പരമാവധി 280 അക്ഷരങ്ങൾ ഉൾപ്പെട്ട പോസ്റ്റുകളെ നൽകാനാകൂ. വെരിഫൈ ചെയ്ത ഇൻസ്റ്റാഗ്രാം അക്കൗണ്ടിന് അവരുടെ നീല ബാഡ്ജ് ത്രെഡ്സിലും ലഭിക്കും. ട്വിറ്റർ ആ ഫീച്ചറിന് പ്രതിമാസം എട്ട് ഡോളറാണ് ഈടാക്കുന്നത്. പണം നൽകി വരിക്കാരാകുന്നവർക്ക് ട്വിറ്റർ പോസ്റ്റിന്റെ പരിധി 25,000 അക്ഷരങ്ങളാണ്. മെറ്റാ ഇതുവരെ അത്തരത്തിലുള്ള ഒരു ഓപ്ഷനും നൽകിയിട്ടില്ല.
- ത്രെഡ്സ് ഉപയോക്താക്കൾക്ക് ഒരു ഇൻസ്റ്റാഗ്രാം അക്കൗണ്ട് ആവശ്യമാണ്. ഒരു പ്രൊഫൈൽ സൃഷ്‌ടിക്കുമ്പോൾ, നിലവിലുള്ള ഇൻസ്റ്റാഗ്രാം പ്രൊഫൈലിൽ നിന്ന് ബയോ വിവരങ്ങളും ഫോളോവേഴ്‌സും ഇമ്പോർട്ടുചെയ്യാനുള്ള ഓപ്ഷൻ ആപ്പ് നൽകും. ഇത് ഇൻസ്റ്റാഗ്രാമിന്റെ നിലവിലുള്ള വലിയ യൂസർബേസിലേക്ക് ത്രഡ്സിന് ആക്‌സസ് നൽകും.
- ത്രെഡ്സ്, ഉപയോക്താക്കൾക്ക് (വെരിഫൈ ചെയ്യാത്തവ ഉൾപ്പെടെ) അഞ്ച് മിനിറ്റ് ദൈർഘ്യമുള്ള വീഡിയോകൾ പോസ്റ്റ് ചെയ്യാൻ കഴിയും. ട്വിറ്ററിൽ, നീല ബാഡ്ജ് ഇല്ലാത്തവർക്ക് രണ്ട് മിനിറ്റ് 20 സെക്കൻഡ് ദൈർഘ്യമുള്ള വീഡിയോകൾ മാത്രമേ പോസ്റ്റ് ചെയ്യാൻ സാധിക്കുകയുള്ളൂ.
- ട്വിറ്റർ ഹോം പേജ് ഉപയോക്താക്കൾക്ക് ട്രൻഡിംഗ് പോസ്റ്റുകളും താത്പര്യമുള്ള മറ്റു വിഷയങ്ങളും കാണിക്കുന്നു. എന്നാൽ ഹോം ഫീഡിലൂടെ സ്ക്രോൾ ചെയ്യുക എന്നതാണ് ഇപ്പോൾ ത്രെഡ്സ് പര്യവേക്ഷണം ചെയ്യാനുള്ള ഏക മാർഗം.
- ത്രെഡ്സിൽ പോസ്റ്റുകളുടെ ഡ്രാഫ്റ്റ് സേവ് ചെയ്യാനുള്ള ഓപ്ഷൻ ഇപ്പോൾ ഇല്ല. ട്വിറ്ററിൽ അത് ലഭ്യമാണ്.
- ശല്യപ്പെടുത്തുന്ന അക്കൗണ്ടുകൾ നിശബ്ദമാക്കുന്നതിനും ബ്ലോക്ക് ചെയ്യുന്നതിനും ഇൻസ്റ്റഗ്രാമിൽ ഉള്ള അതേ സംവിധാനങ്ങൾ ത്രെഡ്സിലും ലഭ്യമാണ്.
- Mastodon-ന്റെയും മറ്റ് വികേന്ദ്രീകൃത സോഷ്യൽ മീഡിയ ആപ്പുകളുടെയും അതേ ActivityPub സോഷ്യൽ നെറ്റ്‌വർക്കിംഗ് പ്രോട്ടോക്കോളിലാണ് ത്രെഡ്സ് നിർമ്മിച്ചിരിക്കുന്നത്. അതായത് ത്രെഡ്സിൽ ഫോളോവേഴ്‌സിനെ സൃഷ്‌ടിക്കുന്ന ആളുകൾക്ക് ഇൻസ്റ്റാഗ്രാമിന് അപ്പുറത്തുള്ള വിശാലമായ കമ്മ്യൂണിറ്റിയുമായി സംവദിക്കാൻ ആപ്പ് ഉപയോഗിക്കാനാകും.
- പരസ്യങ്ങളില്ലാതെയാണ് ത്രെഡ്സ് ആരംഭിച്ചിരിക്കുന്നത്. ഉൽപ്പന്നത്തെക്കുറിച്ച് പരമാവധി ആളുകളെ ആവേശഭരിതരാക്കാനാണ് ഇത് ചെയ്തിരിക്കുന്നതെന്ന് ബ്ലൂംബെർഗ് പറയുന്നു.
Post a Comment