ഹോട്ടലില്‍ ദോശക്ക് ഓര്‍ഡര്‍ ചെയ്താല്‍ പ്ലേറ്റില്‍ ഒരു വട കൂടി ഉണ്ടാകും. കൊണ്ടുവന്നുവെച്ചതല്ലേ കരുതി കഴിച്ചേക്കാം എന്ന മട്ടിലാണ് പലരും വട കഴിക്കുന്നത്. എന്നാല്‍ ഒരു വട കഴിച്ചാല്‍ 270 കാലറിയും ദോശകഴിച്ചാല്‍ 85 കാലറിയുമാണ് ശരീരത്തിന് ലഭിക്കുന്നത്. ഒരു വട കഴിക്കുന്നതും 3 ദോശ കഴിക്കുന്നതിനു തുല്യമെന്നര്‍ത്ഥം.
ഏത് പ്രായക്കാര്‍ക്കും ചേരുന്ന വ്യായാമമാണ് നടത്തം. രാവിലെയോ വൈകുന്നേരമോ നടക്കാം. പതുക്കെ നടന്നു തുടങ്ങുക. പത്തുമിനിറ്റിനുള്ളില്‍ വേഗം കൂട്ടുക. 15 മിനിറ്റ് അതേ വേഗത്തില്‍ നടന്നതിനു ശേഷം വേഗം കുറക്കുക. ഒരാഴ്ച കഴിഞ്ഞാല്‍ കാല്‍ കിലോ മീറ്റര്‍ ഓരോ ആഴ്ചയും കൂട്ടി നടക്കാം.
നമ്മുടെ ആവശ്യങ്ങള്‍ കഴിഞ്ഞുള്ള ഊര്‍ജം കൊഴുപ്പായി ശരീരത്തില്‍ അടിഞ്ഞു കൂടും. ഇതാണ് അമിത വണ്ണത്തിന് കാരണമാകുന്നത്. വ്യായാമം ഇല്ലാത്തവര്‍ കാലറി കുറവുള്ള ആഹാരം കഴിക്കുന്നതാണ് നല്ലത്. കൂടുതല്‍ കാലറിയടങ്ങുന്ന ഭക്ഷണം കുറഞ്ഞ അളവില്‍ കഴിച്ചാലും തൂക്കം കൂടും. അമിതഭാരം കുറച്ച് രോഗങ്ങള്‍ അകറ്റി നിര്‍ത്താനുള്ള ചില മാര്‍ഗങ്ങള്‍.
ആരോഗ്യ ശീലങ്ങള്‍
1. മുപ്പതു വയസ്സ് കഴിഞ്ഞാല്‍ ഭക്ഷണ കാര്യത്തിലും വ്യായാമത്തിലും പ്രത്യേകം ശ്രദ്ധിക്കണം. ശരീര ഭാരം കൂടുന്നത് അറിയുന്നുണ്ടെങ്കിലും വിശപ്പിന് ശമനമില്ലാത്തവരാണ് അധികവും. ഇങ്ങനെയുള്ളവര്‍ ഭക്ഷണത്തിന് മുമ്പ് മോര്, നാരങ്ങാവെള്ളം, ചൂടുവെള്ളം എന്നിവയില്‍ ഏതെങ്കിലും കുടിക്കുക.
2. രാവിലെ ചായയോ കാപ്പിയോ കുടിക്കുന്ന ശീലം മാറ്റാന്‍ ശ്രമിക്കുക. പകരം രണ്ട് ഗ്ലാസ് ചൂടുവെള്ളം കുടിക്കുക.
3. പ്രഭാത ഭക്ഷണത്തിനും ഉച്ചഭക്ഷണത്തിനും ഇടയില്‍ മറ്റു ഭക്ഷണങ്ങള്‍ കഴിക്കരുത്. വിശപ്പ് കൂടുതലാണെങ്കില്‍ വെജിറ്റബിള്‍ സാലഡോ പഴങ്ങളോ കഴിക്കാം.
إرسال تعليق